政壇：莫乃光封龍門雙重標準
免費電視發牌風波未息，通訊事務管理局又宣布收回部分3G頻譜拍賣，以增加競爭，並回應市場及營運者要求。通訊局嘅立場同發免費電視牌照時如出一轍，但喺免費電視牌照上勁撐發新牌嘅立法會資訊科技界議員莫乃光今次就立場大逆轉，掉轉槍頭對可能有新經營者大表反對，點解咁雙重標準呢？今次佢幫手封龍門，究竟係因為四大電訊商係佢嘅選民，為選票而示好？定係3G頻譜嘅可能加入者傳為中移動而逢中必反呢？
辯稱為市民着想
莫乃光一一否認，佢話今次3G頻譜拍賣，涉及市民嘅電話費及使用通訊服務嘅水平，擔心拍賣一事會有反效果，並唔係要討好幾大電訊商，亦唔係因為新加入者可能係中移動而反對喎！佢又話，呢件事同免費電視牌照唔同，因為市民睇電視係免費嘅，唔存在質素問題，又話自己唔會逢開放市場、引入競爭就一定要支持。
不過，自從政府就頻譜安排開始諮詢，電訊商就唔止一次靠嚇，簡單講即係多咗營運商，市民第日要付嘅費用更貴，服務亦會擠塞，甚至有啲地方打唔到電話添。點解莫乃光嘅言論同佢哋咁相似嘅，好似搖身一變做咗電訊商代言人咁？莫乃光承認，四大電訊商係佢嘅選民，自己亦有聽佢哋意見，但亦關注對市民嘅影響。
作為資訊科技界嘅代表，莫乃光喺免費電視牌照一事上口口聲聲要為市民着想，引入多啲競爭，更大鬧政府「搬龍門」；今次卻完全無視競爭需要，自己做埋「封龍門」嘅人，咁係咪雙重標準呢？
