SUN搞作：少膽虫手記：淫賤黎被拂
少膽虫返到公司，覺得周身唔聚財。「仲唔快啲問秘書有冇『戴罩』？」房內傳出淫賤黎命令。少膽虫估都估唔到淫賤黎突然「轉性」，以為自己終於甩難，「腦細，小心被人告呀！」少膽虫入房作溫馨提示。只見淫賤黎一臉茫然，智力之低，少膽虫始料未及，「咁樣騷擾女同事，好易出事o架。」
「啪」一聲，又係熟悉的巴掌，「你就騷擾，我尋日叫秘書幫我帶口罩返工，依家問佢攞咋！」少膽虫掩臉龐問︰「腦細，咩事要用到口罩？」淫賤黎從秘書手上接過口罩再道︰「呢排泥頭車一入嚟堆填區，就塵土飛揚，無罩點頂得順？」
「少膽虫你即刻call肥豪返工！」淫賤黎戴上的口罩瞬間轉黑。「叫肥豪返工有咩用？」少膽虫大惑不解。「肥豪體形有番咁上下，當佢做人肉吸塵機，吸晒啲塵咪搞掂囉！」少膽虫感到地位不保，好在道德偉大師早就留咗法寶畀少膽虫，「腦細，唔使叫肥豪，交畀我喇！」少膽虫拎出塵拂，喺淫賤黎面前拂吓、拂吓，一不留神卻拂中腦細，「少膽虫，你拂我？」
淫賤黎咁小器，睇嚟少膽虫又要被人拂番幾十下……
