「反皮」呢個潮語,係用嚟加強語氣,同埋凸顯事情嘅嚴重程度。例如鬧到人「反皮」嘅意思即係,以一個激烈嘅程度鬧爆對方。又例如賭錢輸到「反皮」嘅意思係,輸得好慘重血本無歸咁解。

一場茶杯裏的風波,再一次衝擊特區政府管治,令到本來民望極低嘅政府支持度繼續沉底。同時,喺立法會辯論引用權力及特權法查行政會議一役當中,亦上演咗一場官場現形記,讓市民睇到建制派議員如何背向民意,向權力跪低嘅醜態。個別建制派議員質素之低,真係叫人目不暇給,呢頭話支持要政府交出文件,交代事件,轉過頭又走去投反對票,仲反轉豬肚指摘別人。另外有啲功能組別議員,所屬業界明明係支持政府公開交代,但佢投票嘅時候身體卻很誠實地去保皇。最正嘅都係喺議會叫人「收皮」嘅Tree根哥,加埋立法會元秋,歪理連篇,正好示範咗建制派為保皇可以有幾盡!當然,佢哋講完之後,即刻畀市民鬧到「反皮」。不過,作為長期被屈機嘅香港人,除咗鬧爆之外,又可以做啲乜?

點解形容激烈係「反皮」又唔係「反眼」同「反胃」嘅?是咁的,「反皮」照字面解就係「皮」反了,但到底係咩皮呢?其實呢個「皮」只係男性專享,喺度唔使特別講明白,夾硬反起,係會特別痛。可能係呢個原因,以致後來有人用「反皮」嚟形容激烈。

其實鍾樹根Tree根哥喺立法會叫人「收皮」都唔係衰得晒,起碼佢夠坦率,開宗明義擺明車馬做建制派,無論政府點錯佢都會保駕護航,視民意如浮雲,被人鬧到「反皮」一樣面不改容。總好過有啲人,明明係契仔又扮晒唔係,成日聲稱自己係獨立人士嗰啲,同呃阿婆祈福一樣咁乞人憎!

第一手消息請下載on.cc東網iPhone/iPad/Android/Windows Phone Apps