政壇：搞搞政：建制派真假曳仔議員現形
最近泛民議員要求引用《立法會（權力及特權）條例》（特權法）調查免費電視發牌事件，由於可能動搖到行政會議行之有效嘅保密制同政府管治威信，特權法就好似一塊哈哈鏡或照妖鏡咁，即時照出建制派嘅真假曳仔議員。
阿Paul馬逢國歸隊一地眼鏡
有建制派人士透露，政府只向幾位未表態嘅功能界別議員埋手，除早就放棄向直選嘅阿Paul謝偉俊箍票外，仲特別放棄埋同電視業界有關嘅體文界馬逢國。據聞政府認為阿Paul早已表態撐泛民，甚至參與泛民聯署，所以由頭到尾都冇重點游說佢；至於馬逢國就因業界有極大壓力，政府當初估計佢有機會撐泛民，所以只係象徵式同佢傾吓。
之後政府集中火力向工業界林大輝、保險界陳健波等議員埋手，經過一輪游說後，據聞政府計過就算冇咗大輝一票，都依然夠票反對泛民動議，但就冇預料阿Paul同馬逢國都要雙雙歸隊投棄權票撐政府，亦令唔少建制派人士錯愕。有建制派人士認為，特權法有機會動搖到行會保密制同政府管治威信，大是大非當前，自然要乖乖歸隊支持政府，今次投票結果亦反映阿Paul只係扮曳仔，避免下屆選舉盡失建制派地區樁腳。
至於富貴黨同大輝方面，據聞就算撐政府都未必有分加，所以寧願做真曳仔撐泛民動議。不過，作為建制派做真曳仔咪死路一條？有知情人士話，富貴黨做曳仔只係不滿現屆政府，如果去到佔領中環行動等敏感議題，絕不敢越雷池半步，大輝都係一樣。所以話呢，無論真曳仔或假曳仔，其實都係蠱惑仔！
