香港教育學院尋日向三位首批哲學博士頒發學位，又向包括合和實業主席「哥頓」胡應湘在內嘅四位傑出人士，頒授榮譽博士學位。哥頓笑笑口咁話今次已係佢第八次獲唔同大學頒發榮譽銜頭，仲趁機強調教育嘅重要性。

胡應湘獲頒榮譽社會科學博士榮銜。

胡郭秀萍（右）嘅爸爸（中）不時舉機影相，胡文新（左）就無乜表情。

胡太郭秀萍同阿仔胡文新都有去捧場，記者發現有位老人家坐喺胡太同胡文新中間，不時舉機影低哥頓喺台上嘅一舉一動，原來佢係胡太嘅爸爸。胡太笑稱，阿仔同外公生得好似樣，佢自己就似爸爸，即係三個人都好似樣。望真啲，佢哋三個人嘅側面又真係幾似喎！

哥頓話睇番中外歷史，凡係文明昌盛嘅朝代，一定係教育事業興旺，例如中國有孔子、孟子，又譬如盛產哲學家嘅古希臘等。講講吓，佢話香港現時教育支出佔整體預算百分之二十五，但問佢夠唔夠，佢就大耍太極要問特首喎！莫非佢驚講錯嘢？

教院校長張仁良就話，教院首批哲學研究博士、首屆修讀非教育性學科課程嘅學生尋日畢業，意味教院已正式成為教育同多元學科並重嘅高等學府，令爭取升格成為大學向前邁了一大步。佢又趁機呻話今時今日老師唔易做，壓力好大喎！

第一手消息請下載on.cc東網iPhone/iPad/Android/Windows Phone Apps