商業電台尋日宣布旗下時事議政節目有人事變動,商台行政總裁陳志雲下禮拜一起會開咪,主持《在晴朗的一天出發》,而原本主持呢個節目嘅李慧玲就會被叮走,調番去主持黃昏時段播放嘅《左右大局》。有人質疑調動同商台續牌有關,但陳志雲就話牌照二○一六年至到期,仲未開始討論續牌問題,叫大家唔好太敏感喎!

商台開記者會交代人事變動期間,有人質疑佢哋係為續牌而調走經常喺節目批評政府嘅李慧玲,陳志雲就強調同續牌無關,只係喺呢個面對大是大非同挑戰嘅年代,佢哋要投入更多資源去提升議政能力。對於有人話有關調動係為咗取悅政府,佢就話呢個傳聞令佢好困擾同唔開心。

李慧玲尋日原本要返商台開工作會議,但最後都冇去到,而佢夜晚就喺社交網站留言,話今時今日嘅香港應該有心理準備任何事情都可能發生,仲話佢會留守到最後一分鐘,多謝大家關心咁話。

第一手消息請下載on.cc東網iPhone/iPad/Android/Windows Phone Apps