政壇：立會濫開組 洗腳唔抹腳
立法會除咗大會之外，為方便議員就唔同範疇嘅政策進行討論，同時設有十八個事務委員會，而每個事務委員會更可就部分社會議題再成立專門研究政策事宜嘅小組委員會。不過，今屆立法會只係運作咗一年，小組委員會數目已超出原定八個上限之餘，仲有至少四個小組委員會喺輪候名單上排緊隊準備成立。內務委員會主席梁君彥尋日開會時就寸爆班議員「洗腳唔抹腳」，搞到啲小組委員會愈開愈多。
《內務守則》規定，研究政策事宜嘅小組委員會要喺展開工作起計嘅十二個月內完成工作，並向相關事務委員會作出報告。但今屆啲小組委員會遲遲都未完成工作，內會尋日討論延長小組委員會工作期嘅建議，梁君彥講明現時所有進行中嘅小組委員會最多只可以喺期限屆滿後延長多三個月，而日後所有事務委員會下面最多只可以成立兩個小組委員會，多出嚟嘅就要排隊喇！
退休保障小組輪候中
班議員聽到主席咁講，即時舉手話自己嘅小組委員會好重要，工聯會王國興話自己嘅長遠房屋策略小組委員會仲有好多工作未做，名副其實洗頭洗咗一半；議員鍾樹根又話自己嘅監察西九文化區計劃推行情況聯合小組委員會已經擬定好議程，得番三個月時間唔夠時間開會。
梁君彥即時寸爆王國興同鍾樹根，話個個議員都「洗腳唔抹腳」，亂開小組委員會之餘，小組委員會主席又覺得自己個委員會好緊要唔摺得，如果再唔定下機制規定委員會要幾時完成工作，咁其他小組委員會如退休保障事宜同處理家庭暴力策略同措施等小組委員會，就只會一直喺輪候名單上，唔可以喺本年度立法會會期內展開工作。
