港台大樓燒銀紙 獨立王國演鬧劇

故事劇情係咁嘅，港台打算喺將軍澳興建新大樓，○九年嘅舊估價係十六億元，點知最新估價飆升至逾六十億元，短短四年間造價暴增三倍，嚇人程度簡直同講深宵怪談差唔多。喂，港台係搞廣播定燒銀紙呀？十六億變六十億，使錢好似倒水咁，納稅人多多錢都唔夠你哋揈啦。難怪立法會議員紛紛發炮，批評新大樓前後估價差天共地，公眾嘩然，質疑一年半載後又會戲劇性暴增。

議事堂炮聲隆隆，當局點解畫呢？廣播處處長鄧忍光話喎，當年估算未有計及政府要求嘅新服務喎，好似數碼聲音廣播、社區廣播、新電視頻道、媒體資料庫等等。建築署就話，新大樓會有太陽能發熱板、隔熱功能外牆、冷氣變速調校器等綠色設施喎。

哦，咁就唔怪得新大樓燒銀紙咯，咁識歎，設施咁豪華，想唔變大花筒都唔得啦。先唔講所謂嘅「政府要求嘅新服務」係咪真係有需要，就算有需要都應該衡工量值吖，冇理由洗腳唔抹腳，當公帑唔係錢o架。港府興建新總部大樓「門常開」，都係用咗五十億元，港台建新大樓居然要用六十億元，咁咪即係九品芝麻官嘅官邸仲豪華過皇帝嘅王宮？點講都講唔過去啦。港台歎慣豪慣，想點就點，睇嚟唔止係無王管獨立王國，直頭係目中無人太上皇吖！

咁講啦，如果港台真係有存在價值，有發展潛力，對香港有貢獻，斥資建新大樓唔係冇得商量。弊就弊在港台烏煙瘴氣，醜聞多多，一時被炮轟管理不善，一時被踢爆濫用公帑，社會要求收檔之聲不絕於耳。喺咁嘅情況下，港台冇被關閉都偷笑啦，家陣仲話耗費巨資大興土木，你話呢幕係咪本年度最荒誕嘅政治鬧劇吖？

更荒誕嘅係，港台作為政府部門，食納稅人俸祿，居然成日打着「編輯自主」旗號，同港府唱對台戲。陰陽怪氣，冷嘲熱諷，為港府施政添煩添亂不特止，甚至做埋國際反華勢力嘅應聲蟲，以後嘅新大樓話唔定就係未來造反基地嚟o架！

不過咁，港府都唔好怨人咯，要怨就怨自己。幾年前大鑼大鼓檢討港台角色，結果搞咗一大輪之後原地踏步，唔止冇手起刀落永絕後患，今日仲貼錢擴充大本營，如果港台以後反政府力量如虎添翼，官老爺就係作繭自縛，自取其辱，叮！