SUN搞作：打橫嚟講：點解啲老師咁低B？
近年，香港特區內，不但人口生長率下降，連呢度嘅人的質素亦好唔得去邊。
每日新聞報道，看到這兒的反智、笨拙、愚蠢、低能嘅事，正如台灣佬話齋：真係「罄竹難書」。
勿以為上邊所謂的蠢事，係由無知師奶搞出來的，原來，自詡讀過吓書的「識字分子」所做的舉措，更弱智傻B得多！
嗱！英華小學算得上香港名校吖！日前，有老師向小一同學出題，考問「常識」，點知……唔止深到家長都唔識答，仲離譜到嗰啲問題完全並非「常識題」，更不是小學程度能應付的。話係「時事題」？佢又有問「哪一位藝人專程從內地趕回香港舉行記者會，宣布辭任演藝人協會會長？」喂！即使識答係曾志偉，咁又代表乜呢？《歡樂今宵》答中有洗衣粉送嘅「娛樂八卦新聞題」呀？對小一學生有何裨益？另一條又問邊部荷里活電影在港拍攝期間遭人勒索？小朋友又怎知何為「勒索」呀？老師！你哋知唔知出題係有指導性影響的，即係叫小朋友睇多啲娛樂版乎？喂！究竟你哋知唔知乜嘢叫做「常識」o架？
小朋友要知的「常識」，係「天虹點解會有七色」、「電燈點樣至會發光」、「蜜蜂如何採花蜜」，而唔係近日新界及大嶼山的士落旗加價幾多呀？低B仔！
話香港新一代學生點唔掂點唔掂，其源頭係一班笨拙腦殘的大人搞出來的。
我唔知成間英華小學出咗問題吖？定係一個出問題嘅老師出咗問題，但此乃全港普遍的大問題囉！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊（目及）實政府
