通訊及廣播事務管理局日前向立法會資訊科技及廣播事務委員會提交文件，指該局一直支持連發三個免費電視新牌照，擺明同政府唱反調。泛民議員隨即將該局主席何沛謙捧成英雄，並建議喺下個月再次邀請佢嚟立會親身插多政府一次。有知情人士指何沛謙尤其多公文袋朋友，「貪曾」前特首曾蔭權爵士當年好重用佢，委任佢做多項重要公職。

設計圖片及對白

通訊局任期到2015年

何沛謙係資深大律師，佢同外號「大狀黨」嘅公文袋多名核心成員各有唔止一段緣，其中公文袋黨魁梁家傑係佢嘅九龍華仁師兄，該校仲出過外號「李漢奸」嘅白鴿黨創黨主席李柱銘，同該黨立會議員涂謹申等泛民法律界人士。

佢喺九五年起出任大律師公會執委，到○五年先卸任，期間幫過李志喜、余若薇、湯家驊同梁家傑四任大律師公會主席做事，呢四位大狀咁啱全部都係公文袋創黨成員，而佢同余若薇、另一公文袋核心成員吳靄儀，依家仲共處同一間大律師樓添！

吳靄儀幾年前想退休唔選立會法律界議員時，據聞曾大力游說過佢接棒。到去年特區政府換屆，湯家驊更公開推薦佢出任律政司司長，而湯家驊個仔湯煒軒，據悉亦跟過何沛謙做實習大律師。

何沛謙同公文袋關係千絲萬縷，但出奇地獲貪曾政府重用，但現屆政府早前委任「梁粉」黃玉山「空降」消委會做主席，而無畀做咗多年副主席嘅何沛謙「坐正」，已多少反映到現屆政府對後者有幾信任。唔知佢喺通訊局嘅任期到一五年屆滿時，政府仲會唔會同佢續任呢？

第一手消息請下載on.cc東網iPhone/iPad/Android/Windows Phone Apps