政壇：葉劉靚裙三日「復活」

早幾日都講過，新民黨主席葉劉淑儀上星期一晚連踩兩場晚宴，為咗靚爆全場，佢仲專登着件法國名牌晚裝，但點知爆咗拉鏈，搞到佢不知幾尷尬，要同場嘅阿女陪佢返屋企換衫。不過，葉劉前日出席紀律部隊周年晚宴時，又着番同一件晚裝喎！

原來條裙短短幾日已整番好。葉劉話條裙雖然係大減價時買，但計落都成萬蚊，絕對唔係平價衫，但條裙拉鏈位竟然一郁就爆，搞到佢當眾出醜，所以間舖好緊張呢件事，三日內迅速幫佢整番好件晚裝，當然唔收錢啦。佢話自己唔係好嬲，但下次係咪再買呢個牌子就要諗過度過。

件晚裝啱啱整好，但葉劉已經急不及待，再着住佢穿梭Ball場，上周六佢出席入境處周年晚宴，就係着住呢件戰衣滿場飛同人乾杯，心情勁靚，又主動同幾位紀律部隊頭頭合照，好似「集郵」咁一個不漏，永不落空。