五大商會尋日舉行商界聯席午餐會，邀請特首CY梁振英做主講嘉賓，工商界代表都把握機會提問，其中立法會議員蔣麗芸嘅老公、中華總商會常務會董梁海明疑開口夾着脷，竟將人口政策諮詢文件提及嘅勞動人手嚴重短缺問題，誤當作係長遠房屋策略督導委員會文件提出，初試啼聲提問就撞板而回。

中華總商會常務會董梁海明

不過，梁海明嘅問題都叫一步到位，相反首名提問者、中華廠商會副會長李秀恒提問連意見長達四分鐘，搞到身為午餐會主持、廠商會會長嘅施榮懷都多次提醒盡快提問。

簡單嚟講李秀恒係想政府考慮設一個時限，可向當局申請放寬地積比率或容許部分樓宇加建數層，期間佢仲以油炸鬼小心食用可不抹嘴，同埋漢堡包因有汁嘅關係一定要抹嘴為例，比喻興建高樓同屏風樓係兩回事，唔知現場有幾多人明白呢個比喻呢？

第一手消息請下載on.cc東網iPhone/iPad/Android/Windows Phone Apps