政壇：德成局長十問九唔知
政府尋日喺屯門舉行最後一場地方行政高峰會專題論壇，討論各區大廈管理同維修問題，仲邀請發展局局長「波波」陳茂波、民政事務局局長曾德成同民政事務署總署長陳甘美華等人出席。雖然波波因事遲咗足足成半個鐘先抵達，但佢都唔及德成局長咁坐足成場，仍然聽到一頭霧水。
設計圖片及對白
話說有區議員建議減少業主立案法團成員嘅數目，又話要攞授權票時，好多時都造假，應該點搞好？點知德成局長即刻話交畀常秘答。楊立門隨即話當局都知道有咁嘅問題，所以會發一啲指引畀法團，要佢哋跟足程序去做。
養狗問題唔識答
隨後有屯門區議員呻，大廈法團同居民最大衝突之一係養狗問題，區內唔少居民投訴經常受到狗吠聲困擾，但報案警察又做唔到嘢，於是就叫曾德成教吓佢點做。德成局長聽到後竟然好老實咁答：「養狗嘅問題我真係唔識答。」佢跟手無厘頭話有啲屋苑寫明唔畀養狗，但又有啲業主好鍾意養狗，之後就更加轉咗去答另一條問題，完全係答非所問。
吓！乜都唔識，又將啲問題推畀楊立門答咁離譜，咁不如楊立門做埋德成局長份工喇！
冇耐，元朗區議員郭強話區議會轄下嘅環境改善委員會啱啱開完會，有位女議員聲淚俱下爭取喺區內興建隔音屏障，但環保署就話因政策所限，唔可以喺佢指定嘅地方興建隔音屏障，要求政府直接處理事件。唔知係咪聽伊人落淚分外憐惜，德成局長即時要求對方將更多資料交畀局方，又問起隔音屏障要幾多錢，承諾會將意見交畀有關部門處理。
