水署工程擾民 三年六百投訴

究竟有幾難？睇吓水務署點樣亂掘馬路咪知囉。日前本報踢爆水務署縱容承辦商偷步掘窿，搞到七國咁亂，而記者進一步追查發現，就算喺規定嘅時間開工，同樣問題多多，極之擾民。過去三年，淨係涉及掘路噪音同空氣污染嘅投訴就有六百宗，即係每隔兩日就有一宗，問你服未。

嗱，好似中環一個工程咁，工地放咗一部發電機，排氣口竟然對正路邊店舖，大量廢氣直接吹入店內，係人都避之則吉喇，搞到店舖門堪羅雀，生意冷清，最慘係避無可避嘅店員，淪為「人肉吸塵機」。仲有吖，九龍城一個水管鋪設工程地盤，周不時用挖掘機鑿地，沙塵滾滾，附近店舖飽受滋擾，有人幫襯至奇喇。

咁都未算吖，水務署仲擺明靠害添。好似荔景一個水務工程咁，承辦商話需時半年，毗鄰屋苑嘅巴士站要暫停使用，其實工程唔使半個月已經搞掂，點知水務署遲遲唔解封，搞到居民出入不便，怨聲載道。

本報早前揭發水務署官僚監管失職，灣仔馬師道一帶工程承辦商提前三個月甚至半年掘窿霸地，署方闊佬懶理，嚴重影響交通安全同商舖生意。最離譜嘅係，灣仔區議會事後開會討論有關問題，出席嘅官員居然矇查查，你話港產官僚係咪抵鬧吖？所以話，官僚靠得住，豬乸會上樹。

係人都知，香港人口稠密，車多路窄，偏偏日日都有掘路工程，一時水務署，一時電力公司，一時煤氣公司，一時電訊公司，好像車輪咁轉，搞到永無寧日。講到底，都係因為政府部門各自為政，既冇統籌，又冇溝通，更加冇同公用事業機構好好協調，係唔係都亂掘一通，有乜法子唔搞到七國咁亂吖。好似葵涌石排街咁，同一路段四年內先後六度進行掘路工程，呢頭啱啱補完個窿，嗰頭又掘過，唔止浪費公帑，嚴重擾民，更加影響商舖生意。

港產官僚口口聲聲「民生無小事」，可惜得個講字。申訴專員公署曾經公開點名批評食環署、路政署、地政署、運輸署等部門敷衍塞責，胡混度日，結果又點呢？咪又係死性不改。唔怪得有人話，港產官僚嘅作風愈來愈似國產官僚，真係冇講錯o架，叮！