「食滑」呢個俗語其實出現咗好耐,一般係市井或社團人士用得較多。後來因為互聯網發達,加速跨階層跨世代嘅語言交流,所以近年開始多人用「食滑」呢個詞。「食滑」嘅「食」並非解進食,而係港式粵語中「食住你」咁解。「食住」一個人等同於掌握一個人嘅一啲弱點,並且加以利用,嗰個人會對你千依百順,唯命是從,有啲似普通話「吃定你」嘅意思。「食滑」就比「食住」再高一個Level,被「食滑」嘅人,直情係一舉一動所有嘢都喺預計之內,完全無反抗嘅能力同餘地,就算想反抗都無計可施。「食滑」就即係長期被人食住,食到好似啲機器齒輪磨得多咁「滑晒啞」。「食滑」你,就即係無論點樣對你,你都唔會反抗,繼續畀人食!

泛民主派立法會議員,早幾日動議試圖以權力及特權法,要求政府公開行會決定免費電視牌照嘅相關研究報告同文件,等公眾可以知道政府到底以咩嘅準則,去審議免費電視發牌問題。好多市民當然希望知道到底係「一籃子」因素,定係「一男子」因素,搞到大家少咗電視節目選擇。不過儘管經過多次大型集會,民意取向相當清楚,就連一啲建制派保皇黨立法會議員,喺辯論議案嘅時候都罕有咁發言批評政府今次處理失當。不過建制派呢啲所謂近似人類嘅發言,都係喺傳媒鏡頭前做場戲,到真正投票嘅時候咪又係全部歸位跪低,無視民意投反對票。議案結果因為功能組別過唔到,最後喺立法會遭到否決。喺現行立法會嘅屈機制度下,完全合情合理合法。誠如激進民主派議員黃毓民,喺今次議案辯論發言嘅時候所講,特區政府根本就係「食滑」香港人,無論政府做乜,市民大眾都奈佢唔何,唔識反抗,吹得佢漲咩?

最近有傳媒話香港反對派嘅人係賤骨頭,係要強硬對付。其實,照香港人和理非非嘅特性,群眾運動目的未達,最後次次都和平散去,第日準時返工做資本家嘅奴隸,唔使強硬對付,本身都「食滑」咗你啦。次次遊行集會嘈完咪又收工去打牌唱K瞓覺……政府理你至奇!

第一手消息請下載on.cc東網iPhone/iPad/Android/Windows Phone Apps