政壇：搞搞政：建制埋門挑機 馮檢基有排震
泛民同建制喺各個政治領域爭地盤，其中喺俗稱「超級區議會」嘅區議會（第二）功能界別選舉中競爭最激烈。今屆立法會，泛民由涂謹申（阿涂）、馮檢基（阿基）同何俊仁（鐵頭仁）取得三席，失咗一席嘅建制據聞已開始對三人作針對性部署，搞到阿涂同阿基都各有壓力，其中阿基更面臨入門挑戰，事關工聯會可能改由十大傑出工會青年工作者林偉文出戰，依家阿基嘅老巢深水埗麗閣一帶，已經有林嘅橫額擺下擂台，來勢洶洶唔到阿基唔驚喎！
設計圖片及對白
據聞，阿基嘅老對手、工聯會范國輝連番挑戰阿基失敗後，新一屆工聯會將另外布陣。要知道，超級議席嘅入門資格係首先要做到區議員，阿基唔驚就假喇！偏偏前日天主教監察組話阿基缺席立法會大會達十七次，搞到阿基都好緊張。佢翻查立法會資料後澄清，其實自己只係缺席兩次，咁點解雙方說法有咁大差異呢？監察組回應話，佢哋係逐日計算議員有無開大會，至於立法會秘書處就係每逢立法會大會，只要議員曾經出席，無論之後連開幾多日，都會計算議員有開會喎！
同樣有得震嘅阿涂上次喺油尖旺奧運選區僅以百多票之差勝出，形勢並唔係好穩陣，最近有傳油尖旺區議會副主席、委任區議員高寶齡呢個九龍社團聯會重量級人物蠢蠢欲動，有意出山撼低阿涂，有資深地區人士證實，高寶齡曾到阿涂區內大型私人屋苑開會，而且同部分屋苑居民相熟，雖然家吓距離二○一六年立法會選舉仲有三年時間，政壇暗戰已經拉開序幕，局中人真係要打醒十二分精神。
