鄉議局主席劉皇發(發叔)喺議會多年,無論出席率、提案率等都被喻為懶蛇,前日立法會天主教監察組更批評佢二十二年來都冇提過任何動議或修正案。但佢尋日突然發威,提出「處女」議案擬修訂將西灣村剔除納入郊野公園範圍,唔知佢將來會唔會落力啲洗脫污名呢?

發叔今個星期三首次出席修訂郊野公園範圍嘅《2013年郊野公園(指定)(綜合)(修訂)令》小組委員會,突襲提出修訂,點知因為字眼唔符合正式文本要求,當日只係通過作意向表態。唔知呢兩日係咪有法律中人指點,佢尋日就正式去信委員會,要求廢除將大浪西灣嘅「不包括土地」納入西貢東郊野公園,但就唔反對將金山同圓墩納入郊野公園範圍嘅修訂。

由於呢條係附屬法例,屬「先訂立、後審議」,議員修訂就要經分組點票。睇番議程最遲要喺下月四號,修訂就要提上大會表決,如果到時好似限奶令咁,一個唔覺意有人「拉布」,趕唔切喺嗰日表決,咁就成條法例原裝通過,所以發叔要認真拉票喇!

第一手消息請下載on.cc東網iPhone/iPad/Android/Windows Phone Apps