政壇：鍾樹根硬啃廁紙數
區議員一向予人感覺都係理埋啲細眉細眼嘅地區工作，唔知係咪咁，搞到某啲議員嘅眼光都特別狹窄。立法會民政事務委員會尋日開會討論增加區議員津貼，當局早前已建議增加三成四實報實銷津貼，點知唔少議員都仲係批評多多，身兼東區區議員嘅鍾樹根更大呻，營運開支一項申領唔到廁紙數，要自己自掏腰包買廁紙，樹根咁緊張廁紙數，既反映佢好重視如廁暢唔暢順，又轉個彎向政府施壓，點知民政事務總署署長陳甘美華即刻還拖，區議員每月可申領四千元雜項開支，樹根唔會唔知呀？
設計圖片
呻無錢畀長期服務金
樹根聲稱，有啲物品喺區議會申領唔到津貼，就好似廁紙咁，佢把鬼火話議員辦事處經常有人出入，街坊同職員都要用廁紙，一星期用兩卷又有乜出奇呢？但因為民政處唔肯確認呢筆廁紙數，於是樹根惟有自己「啃」，唔知呢筆數有幾多錢搞到佢咁緊張呢？
樹根之後又呻，話做咗二十二年區議員，一直都要自己補貼，就算佢選區喺公共屋邨，都有租金以外問題，皆因佢話每星期都有十幾二十個居民個案要處理，又要接見居民，又要寫信追政府部門，請一個助理都搞唔掂。講講吓佢仲透露有個助理跟咗佢十八年，如果有日退休，按勞工法例支付長期服務金都唔知點算，嗰時就要按埋層樓。
民政事務總署署長陳甘美華就話，其實有好多物品可以申領雜項開支津貼，每個月有四千元，樹根或者可以諗諗申領番呢筆廁紙數。至於其他議員就關注私樓辦事處租金高昂問題，建議設立專項申領租金開支。民政事務局局長曾德成又話，建議加幅已經幫到百分之九十八嘅議員辦事處開支，如果租用高檔寫字樓就難以負擔喇！莫非佢暗示叫啲議員慳啲使？
