常識題，由屯門去澳門最快要幾耐？可能有人會答，由屯門長途跋涉出尖沙咀搭船，然後再山長水遠過大海，至少都兩粒鐘啦。嗱，呢個答案可以話啱，亦可以話唔啱，事關由屯門去澳門嘅捷徑其實係直接由屯門碼頭出發，船程只需一個小時，比兜圈路線足足節省一半時間o架。

冇錯，太一叮講緊嘅咪就係舊年停辦嘅屯門往來澳門跨境渡輪航線囉，依家話打算重開喎，不過能否成事仲係未知之數。事情係咁嘅，海事處決定半年內為屯門客運碼頭重新招標，但無吸取教訓，居然繼續要收取高昂租金，政策死板程度簡直同碼頭石躉有得揮。喂，舊營運者經營咗年半就關門大吉，死因正係無力承擔每月二百幾萬嘅昂貴租金，今次再招標一個崩都唔減，就算有人夠膽入標，日後都隨時重蹈虧損離場嘅覆轍，到時咪又搵居民嚟搞？所以咯喎，有區議員收集咗二千名居民簽名，要求當局實事求是，一係將碼頭以公帑營運，一係以優惠價招租，以免航線流標，令居民再次失去一條便捷之路。

屯門居民民情洶湧，官老爺點回應呢？海事處話喎，收租旨在抵銷成本，有必要按商業原則計算租金喎。而運房局就話，現時往來澳門嘅尖沙咀中港碼頭同上環港澳客運碼頭仍有足夠容量提供跨境渡輪服務，當局冇計劃開設第三個公營跨境渡輪碼頭喎。

呢啲咪叫僵化囉！重開屯門碼頭主要係便利新界西北居民吖嘛，同另外兩個跨境渡輪碼頭係咪逼爆根本無關。當局自己都識講啦，現時港九兩個碼頭都係以公帑營運，點解零零舍舍對新界居民大細超呢？唔通新界西北居民好蝦啲？至於話收租抵銷成本就更加好笑，重開航線究竟係為服務居民定係服務庫房吖，簡直本末倒置，九唔搭八！

仲有吖，屯門碼頭收貴租聲稱按照商業原則，咁點解離島航線你哋又用公帑補貼呢？講到底，渡輪服務係為便利居民，係公共事業，點可以一味錢字當頭吖。

所以話，今屆政府成日講「適度有為，穩中求變」，唔該呆板硬膠嘅官僚主義變通吓啦，只係識按本子辦事，一本通書睇到老，點有為吖，點求變吖！

咁講啦，屯門碼頭重新招標係好事，但係都要識得靈活變通，先至可以水到渠成，當局若然真心想福為民開，請先船為民開。嗱，咪話太一叮唔提醒，香港民怨升溫，社會躁動不安，「佔領中環」蓄勢待發，萬一碼頭流標，搞到居民先來一個「佔領碼頭」，咁就大件事嘞，叮！

第一手消息請下載on.cc東方互動iPhone/iPad/Android/Windows Phone Apps