呢排好多政商界人士排住隊擺喜酒，好似消費者委員會主席黃玉山嘅仔Brendan喺上個星期六要擺婚宴，在儀式完成後，新娘子阿Yen仲抱住新郎，感動落淚。黃玉山一向公職多多，本身係港區全國人大代表，又係候任公開大學校長，因此佢今次辦喜事，好多政商界中人都親臨祝賀，包括教育局局長吳克儉、香港基本法委員會副主任梁愛詩、恒隆地產董事總經理陳南祿、港區全國人大代表譚惠珠、馬豪輝、姚祖輝、陳勇等。

梁愛詩（右）盛裝到場恭賀一對新人。

黃玉山（左）同太太喜上眉梢。

拖手進場

深情一吻

甜蜜落淚

新老爺奶奶滿場飛

一早到場嘅吳克儉話同黃玉山認識多時，所以早喺個人日曆記低呢個日子；立法會中總代表廖長江都有帶賀禮嚟，至於送啲乜，佢就大賣關子唔肯透露，強調一切只係心意喎，佢又透露同黃玉山有淵源，早喺九十年代初一齊做公職而認識。

除咗現場星光熠熠外，一對新人喺酒店場地布置方面嘅心思係另一亮點，首先宴會廳外拍照場地，主要以紫色和白色為主色，感覺簡單柔和，至於宴會廳內嘅主舞台，以紅色為底色，配以一對新人英文名字，砌成「囍」字。

黃玉山伉儷眼見愛子成家立室，全日都笑意盈盈，並且「滿場飛」同親朋好友合照留念，當問到希唔希望阿仔同新抱快啲生BB，黃玉山話一切順其自然，唔會畀壓力佢哋喎！

第一手消息請下載on.cc東網iPhone/iPad/Android Apps