政壇：搞搞政：開會鬥窒 公文袋不和浮面
上屆立法會公文袋雖然只有五席，但五位議員都係大狀出身，起碼講起上嚟都同聲同氣。縱使湯家驊喺上次政改方案上唔同意公文袋參加五區總辭，甚至揚言會退黨以示不滿，但大家最後都和氣收場。
設計圖片
但時至今日，公文袋喺立會得番三個大狀，其餘有傳媒出身嘅「阿毛」毛孟靜、學者做議員嘅陳家洛同新加盟嘅郭家麒醫生。依家幾個議員不時雞同鴨講，搞到內部愈嚟愈唔協調，先有陳家洛同阿毛因四川賑災撥款鬧交鬧到出晒面，兩人喺立會時「面左左」，後有陳家洛同郭家麒同期去信食物安全及環境衞生事務委員會，要求委員會跟進違規冰鮮肉店個案，黨友爭嘢做，再次凸顯黨內溝通不足。
直至最近，阿毛以「香港本土」名義喺報章刊登提倡「源頭減人」嘅聯署廣告，即時畀各大黨派圍剿鬧佢歧視新移民。泛民其餘議員隨後發表另一聯署聲明，呼籲社會要以包容、公義嘅原則對待新來港人士，公文袋黨魁「袋巾傑」梁家傑雖然無開口批評黨友，但都有份參與聯署，似乎一切盡在不言中。
據聞，依家公文袋每次開執委時，幾位不和議員都會先自說自話，繼而互寸窒爆對方，見到大家嘅不和已浮晒上枱面，主持會議嘅袋巾傑都無從入手唔知點處理。
公文袋現時一盤散沙已係不爭嘅事實，再係咁落去，就唔好再提某某黨員會去選特首喇！
