政壇：莫樹錦GEL行頭主持會議
中文大學醫學院臨床腫瘤學系教授Tony莫樹錦醫生最近再揚威海外，以國際肺癌研究協會主席身份喺澳洲悉尼主持會議，係全球第一個華人坐上呢個位，認真威水。靚仔醫生上慣電視做節目，喺嚴肅嘅會議致辭都不忘幽默，佢話每次到外地發表研究，出門第一件事唔係準備資料，而係必備髮蠟，因為要「GEL行個頭」保持形象喎！
莫樹錦話去外地主持會議，整靚個頭好重要。
對外表同事業同樣認真嘅莫醫生話，佢有今時今日地位，想起當年都幾感慨，因醫學界過往唔重視亞洲研究，○○年佢去國際肺癌會議講解新研究，直頭冇乜人睬佢，依家個個人同佢打招呼。點解有呢個轉變？原來佢同其他專家突破性發現一隻可致肺癌嘅變異基因，本港研究先開始受重視。
「九六年我喺加拿大回流中文大學，嗰陣大多數人研究肝癌、鼻咽癌，而肺癌係豬頭骨，冇乜人掂，近年先興研究基因，發展多咗。」就因為咁，更多嘅肺癌病人就有救嘞！
