政壇：兩名區議員退出富貴黨
富貴黨早前喺油尖旺區議會京士柏選區補選失利，點知屋漏兼逢連夜雨，本身該黨只得十三名區議員，地區實力已唔算雄厚，我哋知道最近該黨再有兩名區議員退黨，一位係元朗區陳思靜，另一位係黃大仙區黃錦超。該黨主席周梁淑怡證實兩人退黨，但莎姐話政黨嘅嘢有入有出好正常，未來會積極諗計吸引新人入黨。
陳思靜
兩名區議員喺十月初正式退黨，陳思靜話退黨原因好簡單，主因係內部出現問題，加上富貴黨喺新界西冇投放資源，既然唔夾就不如分開發展。但有冇政黨搵佢過檔，佢亦都好老實咁話：「話冇就呃你啦！」
黃錦超就話係不滿富貴黨選舉部署亂晒龍，例如舊年立法會選舉，明明佢扎根九龍東多年，但黨竟然叫佢去港島助選，最近一次補選，又叫佢去助選，佢話同黨高層嘈過好多次，但對方唔明白，惟有退黨。
雖然黃錦超係委任議員，但一直有傳佢轉戰直選，佢都承認以獨立身份打選戰較為有利。我哋聽聞負責協調人士已安排咗譚香文嘅地盤畀佢開地區辦事處，明顯搵位畀佢落腳。唔知退出富貴黨，係咪其中一個協議嚟呢？
