政壇：版權法公聽網民贏晒
版權法例諮詢月中結束，立法會工商事務委員會尋日召開公聽會，五十幾個團體同人士出席。網民同版權商分庭抗禮，但以創意論高低，似乎網民就贏成條街，因為遠至宋朝、近至諷刺議事堂議員都有，睇嚟修例仲令網民創意升呢添！
設計圖片及對白
話說尋日公聽會一開始，「蘇軾粵語填詞同好會」書記霜時話，版權法例修訂唔包括填詞，但係宋朝出名舊詩新詞、粵劇名伶唐滌生都係做開舊曲新詞，有乜理由蘇東坡、唐滌生嘅行為被指係非法呢？
「終聯辦」主任支持惡搞
唔止古代人物，代表文化出版界嘅立法會議員馬逢國都畀人潤。立法會「體育、演藝、文化及出版怪」「宮能」組別「被代表」馬馮京話，馬逢國講過二次創作係香港人創作出嚟，係香港嘅瑰寶，「保障二次創作等於維護馬議員說話嘅正確性」。
個公聽會仲跳出香港，其中一個團體「瓦努阿圖終端機服務駐港聯誼辦事處（簡稱終聯辦）」，主任杜夫就帶大家去瓦努阿圖。佢用鍾景輝嘅口脗，戲仿投資移民瓦努阿圖廣告，個廣告食住亞視節目「百萬富翁」gimmick，因為網民惡搞，令亞視台慶宣傳都話自己係「瓦努亞洲——我想睇嘅電視」，亞視又改篇電影片段「亞皆老街，亞洲電視嚟嘅喂！」證明二次創作隨時推廣原作品。
蘇錦樑錯過感動位
「終聯辦」當然支持網民第四方案「用戶衍生內容」，以免「雞汁與濃湯寶佔領中環」喎。南區區議員區諾軒都話，依家網絡熱爆嘅無綫藝員劉江「講呢啲」cap圖或者就會犯法。
版權持有人一方就相形見絀，國際唱片業協會總裁馮添枝話，當局表明唔會繞過版權持有人執法，唔會對網民造成白色恐怖，講到明網民提出嘅「第四方案」定義模糊不清，擔心會引起社會極大爭議，之後有迫切性先再提出。
可惜，商務及經濟發展局局長Greg蘇錦樑冇親身嚟聽吓佢哋咁有創意嘅意見，否則佢一定好感動啫！佢忙乜？睇怕都係免費電視發牌事件喇！
