陰招虐老數不盡 港府漠視是幫兇

涉案安老院位於上水，一名女護理員懷疑多次以陰招虐待長者，惡行最終被同僚揭發曝光。根據偷拍短片，惡女護一日三度虐打一名九旬婆婆，又掃把插頭，又拗手撞門，又連環掌摑，行徑令人髮指。更令人齒冷嘅係，惡女護施虐唔係偶一為之，而係習慣性動作，而且專揀腦退化嘅公公婆婆落手，以為神不知鬼不覺，點知舉頭三尺有鏡頭，今日終於惡有惡報，被警方控以虐老罪名。

唉，長者為社會貢獻一生，晚年居然得到咁嘅「照顧」，究竟係惡女護有病，定係我哋嘅社會病咗？大家應該唔會忘記，幾年前安老界爆出一單駭人聽聞嘅虐老案，無良女護理主任狠到餵六旬老人癡呆症婦人食屎。事實證明，虐老問題數不盡，今次醜聞只係冰山一角嘅咋。

講到呢度，大家難免要問，點解本港長者咁坎坷？點解私營安老院可以亂咁嚟？其實答案好簡單，因為港府係忤逆仔囉。明知資助安老宿位嚴重不足，私營安老院成為好多長者嘅暮年歸宿，居然都監管粗疏，放任不管，唔出事至奇啦。正如關注團體踢爆，如果當局將違規安老院停牌，就要幫院內老人家搵宿位，喺懶得就懶之下，所以咪隻眼開隻眼閉囉。港產官僚坐視亂象，簡直就係虐待老人嘅幫兇！

當然啦，港府麻木不仁，搞到唔少長者臨老唔過得世，嚴格啲講，佢哋唔止係幫兇，直頭係元兇。私營安老院屢爆虐老醜聞，歸根究柢，就係資助院舍長期嚴重供不應求嘅惡果。試諗吓，如果受害長者係入住資助院舍，仲點會受到咁嘅折磨呀？如果資助院舍唔係少到鳳毛麟角一位難求，質素成疑嘅私營安老院又點會門庭若市吖？港府一方面將安老責任卸畀私人市場，一方面闊佬懶理放鬆監管，其實仲冷血過惡護理吖！

弊傢伙，人口政策諮詢文件警告人口老化嚴重，安老院虐老個案容乜易亦會與日俱增o架？各位老人家，與其晚年隨時捱打，不如依家趁行得走得，一於去鵝頸橋底打小人：打你個高官頭，等你有日畀天收；打你粒高官丸，等你老咗要住老人院！喂，社會福利署署長葉文娟，因住臨老遭報應吖。