城中鏡：彭穎生萬聖節慶賀牛一
喺啱啱過咗嘅萬聖節，唔少名人「奉旨」開搞鬼派對。不過對於女童軍總會香港總監彭徐美雲個仔Victor彭穎生嚟講，就攞正牌慶祝，事關佢剛好係萬聖節生日。當日Victor同家人食飯賀牛一，爸爸彭曉明喺台上開金口獻唱贈興，媽媽換上橙色卡通裝束扮「南瓜人」，佢就戴上圓黑框眼鏡、手持神仙棒變身哈利波特，造型維妙維肖。
彭穎生（左）同媽媽彭徐美雲分別扮成哈利波特及南瓜人。（被訪者提供）
剛過三十歲生日嘅Victor尋日現身一個活動，佢甜絲絲咁透露自己最近墮入愛河，女友趁佢生日，仲送咗條名牌領呔「綁」住佢，認真sweet。問Victor會唔會「三十而立」，同女友拉埋天窗？佢就笑言冇咁快住，呢啲事要慢慢嚟喎！萬聖節生日嘅佢話，最難忘每年嘅生日派對都有好多南瓜陪佢過。唔知佢會否因此特別鍾意食南瓜呢？
