城中鏡：史立德良駒贈囡囡
仁愛堂前主席Allen史立德唔淨止係愛妻號，仲係廿四孝爸爸。尋日Allen同太太史顏景蓮、兒子史昊洺同女兒Kathleen史佩加現身沙田馬場，為佢哋名下嘅三匹出賽愛駒打氣，其中一匹「好加加」屬於Kathleen名下，首次出賽即跑第四名，Kathleen甜笑話愛駒係爸爸送畀佢嘅生日禮物。Allen話最初佢送咗隻馬畀囝囝，今年囡囡同佢參加馬匹拍賣會時就詐型，於是佢就買埋匹「好加加」畀個女做生日禮物，一人一隻唔使爭。
史立德（左二）同太太顏景蓮（右二）、兒子史昊洺（左一）及女兒史佩加一家現身馬場好溫馨。
鄧振豪（左）日前向女友Giselle（右）求婚成功，定於明年底拉埋天窗。
曾慶淳（左三）同豹妹（左二）喺終點看台出現，但前者唔多投入。
曾慶淳同豹妹現身馬場，但全程無笑容。
人氣拉麵店老闆Chandler鄧振豪同拍拖一年多嘅模特兒女友Giselle都喺度，Chandler宣布喜訊，日前向女友求婚成功，已定於明年底共諧連理，真係恭喜晒！
貪曾子自行彈走
「貪曾」前特首曾蔭權爵士嘅細仔曾慶淳都嚟咗，身邊仲有同佢喺街邊「激攬」畀《好報》發現嘅「富貴豹妹」Vivien。但曾慶淳同社交界冇乜兩句，見到記者又周身唔自在，本來想去沙圈睇馬，結果都自行彈走。見佢冇乜笑容，可能唔多享受入馬場玩。
