設計圖片及對白
早幾日「星爺」吳亮星同我哋講，話舊年立法會財務委員會經常拉布，已有唔少議員要求上任主席剪布，今年到佢做主席，佢話一定會畀足時間大家議政，但亦唔會手軟，如果審議期間出現不利公眾嘅場面，佢一定阻止。
但剪布要「出師有名」，唔係鍾意剪就剪，最近佢叫立會秘書處幫手搵資料，搵番立會、甚至回歸前立法局年代，當財委會主席遇上有議員不停重複發言，到底主席點裁決，就算連外國議會都有參考。星爺話幾經努力，終於搵到案例點樣阻止議員不斷重複發言，但佢話「賣關子」唔講住，保留神秘感喎！
依家「拉布」招數五花八門，議員可提出幾十萬個修訂，就算每個修訂講一次已拉到天荒地老。星爺就話如果面對無聊瑣碎修訂，例如將個年份或數字改一改就當新修訂，呢啲修訂其實冇乜用。如果議員提出少量修訂都算數，但一旦有人提出數以千計、甚至萬計呢類改動極少嘅修訂，佢話未必批准提出，因為咁做會浪費大家時間、浪費公帑，無人得益。
星爺相信一個道理，就係「鬆咗就好難緊番」，為免自己揸得好緊，而立會主席曾鈺成就好鬆，到時兩人條線唔一致就好肉酸，所以佢都會約見曾鈺成，睇下點樣將大家條線拉得近啲。
第一手消息請下載on.cc東網
