政壇：高佬賢議辦開張有贊助
立法會漁農界議員「高佬賢」何俊賢尋日再有辦事處開張，唔單止佢細佬同舅父嚟捧場，仲有唔少業界翹楚出席，連隻燒豬都係由業界贊助，加埋舉辦開幕禮會場內放住嗰隻本來擺放喺大埔社企「水陸墟」嘅縮細版漁船，真係一睇就知係漁農業界嘅盛事。
弟弟（左）同舅父（中）到場支持何俊賢。
據在場主禮嘅新界社團聯會理事長陳勇透露，原來呢隻小漁船係七年前水陸墟開張時，一眾漁民搵船廠打造嘅，係絕版且無價喎！小漁船上面除按比例設有微型廚房同廁所，仲真係可以浮喺水面，同一般漁船冇分別，載住高佬賢出海都完全冇問題咁話。
出席開幕禮做主禮嘉賓嘅食物及衞生局局長高永文食燒豬食得津津有味，仲話外脆內軟好好味添！但當提及新鮮豬隻，佢即時攞出手提電話，話自己每日下午五點鐘都會睇實新鮮豬隻同牛隻嘅入口紀錄，賣出同賣剩數量，跟住又會留意住大、中、小豬嘅拍賣情況，確保香港有充足牛隻及豬隻供應量喎。
