幾十個BB為廉署拍廣告，希望唔好有一個將來似貪曾同貪湯。
廉政公署出年就四十歲，但近年「貪曾」前特首曾蔭權爵士同「貪湯」前任廉政專員湯顯明先後捲入貪污醜聞，提早為廉署「賀壽」，當中貪湯超豪外訪、送禮、請客更加打爛廉署金漆招牌。廉署為挽回聲譽，今日推出新一輯廣告，由上一輯雞蛋「進化」到用BB做主題，但就堅稱廣告同任何案件無關。
廉署新廣告嘅標語係「發展各異，訴求一致，為下一代，共建廉潔將來」，廣告拍攝唔同BB神態，有笑有喊有踢腳仔，從中「估計」佢哋將來做咩職業，例如歌手、武打明星等，寓意下一代無論做邊行，都需要廉潔社會。其中一個BB就估佢將來會加入ICAC，問到用意係咪告誡廉署人員咪學貪湯咁，廉署社區關係處助理處長何渭枝就解釋，雖然廣告喺爆出貪湯醜聞之後拍，但絕對同任何案件無關，只係一個廣告噱頭喎！
何渭枝話喺七四年廉署成立嗰陣，第一個廣告係一位太太抱BB去舉報貪污，新廣告又用BB做主題，正好係一個呼應。
第一手消息請下載on.cc東網
