政壇：吳秋北張建宗隔空過招
人口政策諮詢文件出台後，各界對入面增加輸入外勞嘅建議議論紛紛，擔心本地打工仔生計受影響。但當本地薑同過江龍搵工爭崩頭之前，勞工及福利局局長張建宗同身兼勞資顧問委員會委員嘅工聯會理事長「吳揪得」吳秋北就先行隔空過招，張建宗頻頻為建議解畫，吳揪得就狂揪政府，話輸入外勞會打擊本地工人就業及壓低工資，直斥係短視嘅做法。
設計圖片及對白
促加人工解決問題
張建宗尋日走咗幾場公開活動時都再三強調輸入外勞係要靈活應對未來勞動人口短暫下降，佢話培訓婦女、殘疾同少數族裔等開發本土勞動力嘅方法，都未完全紓解到人手壓力，強調輸入外勞嗰時會保障本地工人嘅權益、就業機會同工資，唔會畀外勞做廉價勞工。佢又話政府未有既定立場，亦無意繞過勞顧會嘅機制，只係希望社會正視問題同客觀討論。
吳揪得話依家香港已經有三十五萬幾個外勞，冇乜空間輸入外勞，有啲行業仲要過去幾年都冇乜加薪，再輸入外勞只造成僧多粥少嘅局面，拖低工資水平。佢又話，其實香港勞動人口本身可以自給自足，只係有啲行業嘅僱主孤寒，有錢賺都唔肯加人工，另外一啲例如零售、飲食同院舍等等，因為工時長又多嘢做，但人工不變就梗係難請人啦！
佢覺得僱主應該拎啲誠意出嚟加人工，先可以實際解決問題，又話政府應該幫班本地工人做多啲就業及轉業培訓，釋放更多本地勞動力，而唔係下下喊住話輸入外勞喎！
