平機會淪為蛇竇 嘥公帑不如早抖

嗱，平機會淪為蛇竇，唔係太一叮生安白造，而係佢哋自爆。平機會最新年報揭露，委員出席率奇低，喺六次定期及特別會議中，全體十六名委員只有六人零缺席，其餘有人缺席四次，有人缺席五次，甚至有人一次都冇現過身；而喺小組會議中，出席率更加低到你唔信。所以話啫，平機會真係可有可無嘅政治花瓶，試諗吓，如果平機會咁重要，點解委員可以隨便缺席呢？又點解會有咁多懶蟲呢？

有委員話喎，缺席係因為大部分委員都有多項公職在身喎。嗱嗱嗱，問題就喺呢度嘞，港府用人唯親，嚟嚟去去淨係委任同一班人擔任公職，結果唔係炮製咗一班存在利益衝突嘅政商畸胎，就係製造咗一班尸位素餐嘅公職蛇王。好似平機會咁，委員怠職嘥公帑，根本就係對納稅人唔公平！

最好笑嘅係，平機會開會冇人到，但係講到使錢咯喎，佢哋一啲都唔執輸。呢，平機會年報顯示舊年職員外訪、會議及培訓費用暴增，開支逾五十五萬元，比前一年度激增超過一倍。平機會解釋，支出主要用於培訓員工，包括調查、調解、法律及領袖訓練等課程喎。事實係咪咁簡單呢？咪話太一叮以君子之心度小人之腹，廉政公署都被踢爆酬酢分單入帳喇，平機會究竟有冇呢啲蠱惑招，真係要查過至知。

講到呢度，不得不講一句，平機會爛到入心，冇得救o架嘞。一來呢，平機會委員蛇王成性，已經唔係一朝一夕嘅事，早喺三年前，本報已踢爆十六名委員中只有五人「零缺席」，而審計署亦曾經毫不留情開火炮轟，點知三年後嘅今日，情況依然冇改善，你話係咪離譜？二來咯喎，現任平機會主席周一嶽乃係公認嘅官場廢物，佢執掌食衞局時搞到烏煙瘴氣，天怒人怨，平機會喺佢手上肯定衰多幾錢重喇！

咁講啦，平機會唔止係政治花瓶，仲係一隻醜陋不堪嘅政治花瓶，篤眼篤鼻，有礙觀瞻，連純粹擺設嘅功能都冇。嗱，既然委員冇興趣出席會議咯喎，不如索性摺咗佢，咁咪皆大歡喜囉，係咪？