城中鏡：郭台銘誇口短訊免費
鴻海前兩日用唔夠一百億新台幣嘅代價，投得台灣兩個4G頻段，以新人姿態殺入通訊市場。身為大老闆嘅郭台銘收到消息勁開心，話自己嘅目標係「打造全球國際性嘅電信公司」。為咗同中華電信、台灣大哥大呢班老牌業者搶客，佢更加一早部署定，兩年後4G開台嗰時，語音通話同文字短訊全部都唔會收錢。
郭台銘話自己嘅目標係「打造全球國際性嘅電信公司」。
講到進軍電信業，郭董強調「係玩真嘅」，喺攞到4G市場入場券後，鴻海喺高雄軟體園會請多五百至一千個開發技術人員，新定位做全球數據中心同雲端應用開發基地，配合4G網絡應用。
講到未來嘅4G發展，佢話以後移動通訊會係以圖形同影像為主嘅時代，語音通話同文字短訊只會佔頻寬好少嘅一部分，所以將來開咗台，呢部分業務「統統唔使錢」。
