城中鏡：o靚模變評馬人唔靠彩數
賽馬圈一直係男士嘅主場，女士若要做評馬人，實在路難行。○四年放棄模事業投身評馬人行列嘅李潔瑩，入行波折重重，當年因為太年輕而慘遭馬迷白眼，惟有敗走轉行，兜兜轉轉至今成為本港最年輕嘅女評馬人。李潔瑩話賽馬再唔只係博彩，既可欣賞騎術，更可享受家庭樂，連女評馬人都獲得尊重，終在馬圈闖出一片天。
李潔瑩成為最年輕嘅女評馬人，希望藉細心打造專業形象。
曾遭白眼 轉職空姐
本港有五名女評馬人，三十歲嘅潔瑩係當中最年輕嘅一位。佢自四歲起已接觸賽馬運動，為來往中港兩地嘅爸爸抄賽事結果，到畢業後投考賽馬廣播新人選拔，成功打入三甲，成為評馬人。當年佢年僅二十歲就獨自分析賽事，當然冇人理會啦，更被指係唔識跑馬嘅o靚妹。
之後佢轉職空姐兩年，○八年航空公司結業，眼見馬場風氣逐漸改變，於是重投評馬人行列。
潔瑩十年前入行時嘅首場評馬係婦女銀袋賽，咁啱後日就舉辦今年度嘅婦女銀袋日，事隔十年，佢終進身成為全職評馬人，社交網站追隨者有近一萬五千人，而男友亦係騎師。佢希望馬圈增加女性比例，讓女性以細心同親和力打入馬圈，「沿途走勢評述都仲未有女性做到，遲啲想挑戰講吓試閘、晨操」。盼有一天女士都能夠成為沿途走勢評述員。
