城中鏡：惜食廚神送暖
非牟利組織「齊惜福」尋日舉行「深水埗惜福齊行動」，落區同市民推廣健康飲食同源頭減廢訊息。身兼機構發起人及贊助人嘅特首夫人梁唐青儀、社區廚房召集人「美容天后」曾裕齊齊着上圍裙，即場示範炒菜心同炮製橙皮朱古力，仲向街坊派發熱食飯盒同福袋，氹到公公婆婆勁開心。
曾裕（左）炒菜心，氹到公公婆婆好開心。
梁唐青儀（前排左）派愛心飯盒畀街坊。
美容天后捐建社區廚房
梁太話每逢去外國探子女時就會變成大廚，幾乎餐餐自己煮，逢親有剩菜剩飯都唔浪費，餸頭餸尾第二朝就煲粥食。佢話大家食橙後多數棄掉橙皮，其實橙皮好有食用價值，佢即場教街坊炮製酒店級嘅橙皮朱古力甜品。
只見佢好熟練咁一邊做一邊教街坊，點樣用淡鹽水煲橙皮飛水，煲半小時後再換四、五次水，然後用慢火煲溶沙糖同水，再落橙皮煲二十分鐘，拎起放喺網架上風乾，如是者連續做三日，最後蘸上煲溶咗嘅朱古力，就成為酒店級嘅甜品喇！
曾裕就用蔬菜批發市場回收嘅菜心，示範炒少油少鹽嘅健康菜心。早前佢喺屯門捐建一個社區廚房，每日提供逾八百個飯盒畀有需要人士，目前主要供應畀屯門同北區貧困市民，快將擴展到葵青區。為咗有更多人受益，佢最近再捐助添購爐頭，令每日可製作嘅愛心飯盒增加至一千五百個。
齊惜福主席梁祖彬就話希望透過今次活動推動源頭減廢，回收可用物資作愛心轉贈，齊齊為減少廚餘盡分力。
