屋宇署人手不足又唔補充番，仲係咁加工作量，成班員工做到攤攤腰，工會反映咗幾次都冇回覆，終於激發約二百名員工尋日罷工，內部矛盾未解決，外部問題亦多籮籮，例如成千上萬嘅僭建清拆處理唔切，劏房安全等等，咁都未算，前幾日旺角有招牌斷纜，屋宇署「觀望」歎慢板，搞到彌敦道塞爆，唔單止擾民，仲嚴重危害市民嘅生命安全，署長區載佳難辭其咎。
