政壇：搞搞政：想做公記水喉大輝遇阻攔？
本來政治勢力雄霸沙田區嘅政團公民力量（公記），呢幾年發展浮浮沉沉，雖然曾搵人合作，打正旗號出選立法會，但最後都係徒勞無功。據聞公記最近就躊躇緊搵乜嘢人加入「泵水」增加資源，而其中一個選擇就係一直被傳好想直選嘅廠商會立法會代表林大輝，但點知情況一直膠着。
設計圖片及對白
再過多個幾月就係公記成立二十周年紀念，聽聞佢哋會更新宣言。至於內容係乜呢？公記成員話可能會同發展會員、培訓青年政治人才等有關。
成日同政府唱反調
如果公記要擴大政治勢力嘅話，不得不提三年後嘅立法會選舉。公記由最初幫建制派政黨助選，到上屆打正旗號出選立法會，雖然最後都未能成功贏得議席，但下屆又會點呢？有公記嘅核心成員就話，其實佢哋歡迎任何政團、政黨一齊合作，但如果成日講嘢太激、太出位嘅話，就唔係佢哋嘅作風喇。
另一邊廂，我哋又聽聞公記亦考慮到缺乏資源問題，所以認為大輝加入都係一個唔錯嘅選擇，但點解傾咁耐大輝都未入到公記呢？據了解，原因除咗公記內部有分歧，部分成員對大輝嘅出位表現有微言外，仲因為西環唔係太鍾意大輝呢個成日同建制派及政府唱反調嘅百厭仔喎！我哋曾致電大輝查詢，但直至截稿前仍未回覆。
