黃碧雲（左）喺監警會亂提問出醜。
外號「一舊雲」嘅立法會議員黃碧雲，尋日喺監警會同投訴警察課開會時，作為監警會委員竟然三次要求人哋交出違例泊車嘅分區檢控數字，仲公開同主席翟紹唐提出要求添！
監警會尋日討論交通「靈活執行交通法例政策」，大部分監警會委員只係質疑吓警方檢控違例泊車（俗稱「抄牌」）時，點解抄一個唔抄一個惹來投訴，澄清乜嘢時候會抄牌，乜嘢時候警告了事。不過，一舊雲發言時話，政府計劃拆卸油麻地公眾停車場，搞到無位泊車，要求交通總部警司（行政）施德博提供違例泊車嘅分區檢控數字。
唔知衰咗 全場大笑
施德博就回應話無相關數字，話區議會都無相關投訴，點知一舊雲仲要再追問，施德博都冇佢咁好氣，話如果真係覺得難泊車，可以搭港鐵或公共交通喎。一舊雲自己衰咗都唔知，仲要求翟紹唐提供相關數字，最後翟紹唐都忍唔住同投訴課代表話：「我哋委員想要嘅數據唔係同監警會有直接關係，不過如果你哋方便啲，睇吓畀唔畀到啦！」結果惹來全場大笑。
其實監警會嘅職能係觀察、監察和覆檢警方須匯報嘅投訴個案，一舊雲究竟當自己開緊立法會定區議會會議呢？
第一手消息請下載on.cc東方互動
