設計圖片及對白
哈！唔知大家有冇留意，次次當立法會要表決重要嘅議案時，立法會議員EQ葛珮帆都咁啱唔喺香港，例如七月中當財務委員會審議擴建垃圾堆填區撥款申請時，EQ就代表立法會去咗英國國會上堂，唔使就佢所屬選區內嘅將軍澳堆填區表態，成功避免得失當區居民。真係咁啱得咁蹺？
樹根代勞鬧爆政府
幾日前，立法會一個小組委員會討論係咪將西灣村納入郊野公園範圍，雖然西灣村再一次係喺EQ選區範圍內，但佢再次因為出埠去咗斯里蘭卡，出席世界信息峰會大獎國際論壇而缺席會議，要由黨友鍾樹根代勞鬧爆政府咁做好似「搶人老婆」。正因為樹根代EQ做咗醜人，咁EQ就可以同時討好當區居民同環保分子。
EQ缺席投票一不離二、二不離三，好似資訊科技界議員Charles莫乃光，上星期五喺內務委員會會議上，提出引用《立法會（權力及特權）條例》（特權法），索取行政會議文件徹查免費電視發牌一事，EQ當時亦係因為未返港而唔使投票，最後議案就因為富貴黨投反對票而被否決。
雖然EQ又一次避過火球，但立法會下周三就會再次討論Charles嘅要求，即係引用特權法索取行會文件徹查免費電視發牌，唔知EQ今次會唔會坐定定喺度投反對票呢？大家到時要擘大雙眼（目及）實喇！
第一手消息請下載on.cc東方互動
