郵輪母港首航丟架 逆水行舟不進則退
好嘅開始係成功嘅一半，咁壞嘅開始呢？唔使問阿貴，梗係失敗嘅一半嘞。嗱，啟德郵輪碼頭自六月啟用以來，日前終於有第一艘以香港為母港嘅國際郵輪啟航，點知下水禮變成失禮，登船安排七國咁亂，倒瀉籮蟹，搞到旅客未出發先勞氣，香港未攞彩先丟架，你話幾失敗吖！
呢艘風浪中啟航嘅郵輪叫「海洋水手號」，接載三千八百多名旅客，展開五日四夜台灣之旅。本來呢，首航試水象徵碼頭業務一帆風順，可惜吖，啟德啟德，樣樣唔得，首航安排一片混亂，登船慢過龜爬，旅客打晒蛇餅，最高峰有數百個旅客逼爆大堂，有人怒指被罰企逾兩個小時，旅遊變成「摩登走難」，問你怕未。
登船混亂已經丟架，碼頭設施一樣失禮。有旅客批評女廁廁格冇垃圾桶，衞生用品隨地都係，令人感覺烏煙瘴氣，而碼頭冇足夠餐廳畀候船旅客使用，更加令人失望。當然啦，郵輪碼頭甩甩漏漏，除咗令人失望，亦令人失笑，區旗居然倒轉懸掛，簡直烏龍百出，貽笑大方。
講真，睇見呢幕首航亂象，市民真係笑唔出o架。郵輪碼頭姍姍來遲，起步本已嚴重落後周邊競爭對手，如果繼續不思進取，點止輸人九條街，隨時輸人成個太平洋吖。呢，截至一六年底，郵輪碼頭只係接獲五十九宗停泊申請，停泊日數大約一百零三日，即係未來三年使用率不足一成。相比之下，新加坡國際郵輪碼頭舊年十月啟用後首半年已經停泊郵輪七十艘次，同樣上年投入運作嘅上海吳淞郵輪港首年亦停泊國際郵輪六十艘次。唔怕貨比貨，最怕唔爭氣，香港郵輪碼頭相形見絀，港產官僚唔該急起直追啦！
講到呢度，太一叮諗起一句古語：逆水行舟，不進則退。回歸前，香港好似一艘豪華郵輪，乘風破浪，一日千里，點知回歸之後，豪華郵輪變咗一隻破爛舢舨，隨波逐流，載浮載沉，隨時有滅頂之災，睇見都牙煙。嗱，呢啲咪就係港府蹉跎歲月，胡混度日嘅結果囉。
郵輪母港出師不利，香港幾難有運行。港產官僚唔好再瞌眼瞓嘞，香港作為國際旅遊城市，實在承受唔起一次又一次嘅醜聞打擊，快快修補郵輪碼頭嘅甩漏，唔好搭沉船吖，叮！
