日前，《太陽報》頭版要聞，報道香港兒童也承受巨大壓力，甚至有五歲幼孩揚言想死！

呢十六年來的香港特區，不特止沒有了以前那永不言敗的光芒，亦失去了愈是艱苦愈向前的獅子山下精神，剩下的，是一片憂慮、無前景遠望的苦困。

多次的乜乜物物「快樂指數」調查報告，一次衰過一次，顯示香港人充滿悲情的沉鬱過活，唧都唔笑地捱日子，行屍走肉空皮囊。何解會搞成咁呢？

一次又一次的「金融海嘯」及「經濟浩劫」，甚或「世紀奪命毒沙士」，咱們香港人也熬得住，頂得過，點解呢年半，竟可急轉直下，搞到連毛都未出齊嘅塞豆窿也須嚎喊要死呢？

近期，喺街上，確多見了神不守舍，目光癡呆、喃喃自語、瘋瘋癲癲的傻人通處走，有啲，仲係身光頸靚，好中產形象的啊！

咪以為，病到出晒面，畀我哋見到表徵的先係黐嘅！打開電視，睇到香港廢柴政府那群高層官員局長，聽佢哋講嘢，才仲得人驚。真心的，勸佢哋早啲睇醫生同食藥，否則，怕一次又一次的再製造笑爆全球嘅「國際新聞」。

有精神科醫生說：「焦慮症」可由先天和家族遺傳的，一個五歲的小孩，受父母禍延，何其不幸；他們的父母，做乜無端端會有「焦慮症」吖？又，佢哋焦慮啲乜呀？作為愛港的一分子，我哋實在應該好好審視和思考一下呀！

要香港人活得快樂並不難，只要真的可以維持「一國兩制」、「五十年不變」（現只剩下三十四年）、「高度自治」便掂晒！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東方互動iPhone/iPad/Android/Windows Phone Apps