SUN搞作：少膽虫手記：黑暗醜惡
「家陣做記者，仲慘過做蠱惑仔！!」菜嫌貴猶抱琵琶半遮臉，走嚟同少膽虫講：「出親去做嘢，唔係唔畀你採訪，就係畀人打鑊甘！」菜嫌貴愈講愈激動，雙手拍落枱：「你話晒係《爛果》腦腫，你有無幫過我哋同腦細爭取、反映吓呀？」菜嫌貴鼻腫臉青，見到少膽虫嘴角上揚，先至醒起要遮番住自己個豬頭炳。
「今次又畀邊個打呀？」少膽虫強忍笑意，正色道：「姓曹嗰位歌手？黑社會？定係村口條狗呀？」菜嫌貴嬲爆爆咁話：「咪係差佬囉！家陣好多警察都好唔鍾意《爛果》，鍾意嗰啲唔係守緊水塘，就係去沙頭角餵蚊。我哋笑佢紙皮擋水柱同埋掟水樽救火之麻，使唔使咁？」少膽虫無興趣聽佢發牢騷，拋低一句：「嗱，香港社會呢，就黑暗醜惡嘅！依家鬼叫你跟錯大佬咩！大佬我好後悔入咗《爛果》喎？慳啲啦……」
「少膽虫！你扮咩大佬呀？」淫賤黎又好似攝青鬼咁突然出現，少膽虫嚇一跳，之後當然連連否認。但菜嫌貴若有所思：「點解你把聲咁似嗰個成日係網上鬧警察個阿叔嘅？唔通就係你搞到我哋警民關係咁差？」少膽虫正想顧左右而言他，淫賤黎卻急不及待：「我依家就真係火起喇！少膽虫你同我入房救熄佢！」
