城中鏡：張宇人立會派龜苓膏
爆出龜苓膏無龜呢單新聞後，搞到鬍鬚佬吳耀明間龜苓膏店生意一落千丈，冇人敢食。好彩海關前幾日公布測試，證實鬍鬚佬啲龜苓膏有龜嘅成分，總算還佢清白。立法會飲食界議員張宇人為咗幫業界，尋日自掏腰包買咗百幾盅龜苓膏返立法會請議員食，唔通佢都覺班議員「太毒」，要食龜苓膏解毒？
張宇人（中）請食過百盅龜苓膏，幫立會議員解毒。
原來張宇人諗住請班議員食龜苓膏，藉此幫鬍鬚佬間舖澄清謠言。難得免費有嘢食，班議員都好幫手，工聯會王國興就搶先食頭一盅，佢話企喺打工仔嗰邊，為咗唔想見到有店舖倒閉，當然要親自試食龜苓膏增強市民信心啦！
不過，「單雞」單仲偕見到盅龜苓膏時，都睇清楚係咪「涼粉」，又話自己唔鍾意食「涼粉」，嫌佢冇效，當張宇人話呢盅係百分百龜苓膏後，單雞亦識做交戲，幾分鐘內就食晒盅龜苓膏。不過要市民對龜苓膏恢復信心，睇怕要一段時間。
