唔經唔覺，友邦保險已經喺香港上市咗三年，今日有位神秘嘉賓將會喺尖沙咀、銅鑼灣出現，同大家一齊慶祝友邦上市三周年，係邊個咁神秘？之唔係熱刺球會吉祥物Chirpy囉!

熱刺球會吉祥物Chirpy，今日會着住友邦贊助嘅球衣喺市區游走，球迷要留意喇！

或者你會奇怪，友邦同Chirpy有乜關係？原來友邦今年八月成為英國熱刺球隊喺一三/一四年季度三個舉足輕重盃賽嘅球衣贊助商。熱刺係英格蘭足球超級聯賽前列球隊之一，世界各地球迷逾一億八千萬人，喺亞洲嘅粉絲都超過八千萬名，揀球隊都貫徹友邦泛亞洲嘅策略！

翻查資料顯示，友邦一○年招股價十九點六八元，尋日收報三十九點四五元，三年間，股價足足升咗一倍，呢幾年股市咁波動，友邦股價依然節節上升，抽到新股又揸到依家嘅散戶仲唔係賺到笑？

早排集團公布第三季業績，新業務價值增長高達百分之二十六，跑贏市場預期，唔少大行都唱好其前景，股價曾高見四十點四五元！

第一手消息請下載on.cc東方互動iPhone/iPad/Android/Windows Phone Apps