城中鏡：「喬布斯」同蘋果打對台
荷里活型男艾斯頓古查（Ashton Kutcher）主演嘅電影《喬布斯》，今年八月就上咗畫，扮演已故蘋果教主喬布斯。現實中，艾斯頓古查最近真係由電影圈踩過界到科技業，獲全球最大個人電腦生產商聯想聘請，成為新款平板電腦嘅產品工程師。
曾扮演蘋果教主喬布斯嘅艾斯頓古查加入聯想做產品工程師。
艾斯頓古查同喬布斯外形有幾分相似，最諷刺係聯想嘅平板電腦，係衝着蘋果產品而來，佢今次嘅職責，係參與設計，會唔會喬布斯上身，睇通晒大家嘅優劣呢？
聯想最新發表嘅平板電腦「Yoga」，電池續航力延長至十八小時，採用Android 4.2系統，又配備有五百萬像素的攝像鏡頭，係咪搶到蘋果、三星嘅市場份額，真係要拭目以待。
聯想首席市場營銷官David Roman就大讚呢位新任產品工程師，佢話艾斯頓古查喺開發Yoga系列平板電腦幫到手，又提供好多板腦設計、規格、軟件嘅意見。HTC之前搵「鐵甲奇俠」羅拔唐尼拍廣告做代言人，今次會唔會順便搵艾斯頓古查做埋代言人呢？
