城中鏡：廠商會射住 理大有錢途
各間大學籌款競爭愈來愈激烈，好似人稱「理大秋官」嘅理工大學校長唐偉章，近日成功游說中華廠商聯合會豪捐三千萬港元畀理大。點解偏偏揀理大？港大、中大卻無份？唐校長露出勝利笑容話：「我預咗招人妒忌，不過無計，理大一向係工業界搖籃，同廠商會淵源好深。」一句講晒，各有前因，唔恨得咁多。
施榮懷（左）代表廠商會捐款三千萬元撐理大，校長唐偉章（右）連聲感謝。
顏吳餘英（左）接受激光矯視成功，身旁「四眼」嘅莎莎國際主席郭少明（右）未知會否試試？
楊敏德簽完名後，指住簽名影相留念。
理大前晚舉行「璀璨西班牙」籌款晚會，餐桌上有米芝蓮星級名廚烹調嘅西班牙盛宴，仲有激情佛朗明哥舞蹈表演，校董會主席楊敏德、校董會前主席胡應湘伉儷、新鴻基地產非執行董事郭炳湘都睇到入晒神。
唐校長飲得杯落
廠商會副會長Katherine顏吳餘英係晚宴籌委會副主席，商會中人齊買枱支持，但最厚禮並唔係買枱，而係巨額支票。會長Irons施榮懷話為慶祝廠商會明年八十大壽，已拍板通過捐款畀理大，筆錢將用於資助港生北上交流擴闊視野。佢仲拍心口話捐款陸續有來，皆因今次捐款只係同理大「拍拖」嘅見面禮，事關商會向來撐工業發展，同理大教學理念啱Key到極。有呢條「大水喉」射住，唐校長飲得杯落喇!
當晚見Katherine戴副黑框平光眼鏡，原來啱啱做完激光矯視手術。佢雙眼本來有三百幾度近視，刻意將右眼留番一百五十度近視，等將來有遠視都唔使戴老花眼鏡喎。唯一唔習慣，係一個月唔可以化眼妝，前晚只好素顏示人。
