議員Ann蔣麗芸尋日喺立法會提出口頭質詢，話食環署同房屋署今年首八個月收到四百幾宗木蝨投訴，較去年全年多出三倍，但房屋署就以蝨患問題屬個別零星個案為由拒絕提供協助。佢話私人公司除蝨服務收費有時高達萬幾元，公屋居民難以負擔，要求當局設立機制監察全港蝨患嘅分布同擴散情況，協助住戶滅絕蝨患，甚至進行全港性滅蝨大行動。

設計圖片及對白

食物及衞生局局長高永文回應話，食環署職員有就木蝨投訴作出調查，但暫時仲未發現有公眾地方出現蝨患，跟住轉移話題講滅蚊，話食環署有同其他部門進行跨部門滅蚊工作，而防蚊患督導委員會亦會召開會議，目前未發現有登革熱個案。

跟住阿Ann就叫高永文唔好再轉移視線，希望政府對症下藥，資助貧困戶滅木蝨。佢問完冇幾耐，葛珮帆就叉開話題，反映唔少市民投訴有好多曱甴由渠口位爬入屋，問高永文可唔可以用行政手段解決問題喎。吓，乜嘢行政手段？

聽到議員問完木蝨又問曱甴，高永文只能重申政府非常關注事件，但強調絕大部分蝨患喺私人地方發生，屬於私人責任，而署方亦冇足夠人手協助居民滅蝨，反建議住戶透過業主立案法團或互助委員會，聘請較大規模嘅滅蟲公司進行一次過滅蝨工作。之前梁美芬為捉老鼠而打響「鼠王芬」名堂，話唔定阿Ann滅蝨有功可再成佳話，唔知到時會否被封為「蝨芸」呢？

第一手消息請下載on.cc東方互動iPhone/iPad/Android/Windows Phone Apps