政壇：女狀元風高浪急入官場
早前接連有政治助理離開政府惹來「跳船潮」疑雲，近日陸續有新任副局長同政助返工沖喜，最新喜訊係連特首辦都有新鮮人返工，呢個就係出任特首辦研究主任嘅楊容容（Rosy Yang），究竟Rosy係何方神聖，肯喺呢個風高浪急嘅時候加入政府呢個熱廚房呢？
○八年楊容容成為應屆會考女狀元。（資料圖片）
雖然政府未有公布Rosy嘅個人履歷，但我哋明查暗訪後，發現Rosy同特首CY梁振英早有一面之緣，早喺舊年CY競選特首時，佢已經喺競選辦做義務工作，歷時兩、三個月。如果再喺網上翻查資料後發現，更發現佢喺學界一早聲名大噪，中學就讀聖保羅男女中學，及後畢業於英國牛津大學同美國普林斯頓大學，除咗兩文三語外，仲精通日語。
資料顯示，杭州出生嘅Rosy曾喺○五年以香港傑出學生身份，採訪時任商務及經濟發展局局長馬時亨，及至○八年考獲八優同兩科五*佳績，金榜題名成為當年女狀元，翌年仲取得尤德爵士基金獎。其後Rosy又回饋社會，將由細到大共二十萬元獎學金結集成立「楊容容獎學金」，協助家境貧困學生。
另外，發展局前政治助理何建宗尋日獲批准接受委任為清華大學訪問學者，為期一年，期間不受薪，負責審批嘅諮詢委員會認為何建宗遵從若干建議前提下，不會構成潛在利益衝突或引起負面公眾反應。
