政壇：唔聽醫生話葉劉繼續講
立法會議員葉劉淑儀平日除要喺大大小小嘅會議上發言外，仲要以行政會議成員身份向特首進言，真係講少兩句都唔得。不過，一向好講得嘅葉劉尋日開會時竟然有兩聲咳，佢話患有先天性支氣管炎，平時講多兩句都會聲沙唔舒服，早前醫生建議佢唔好再講咁多嘢。
葉劉話患有先天性支氣管炎，平時講多兩句都會聲沙唔舒服。
葉劉話有先天性支氣管炎加哮喘底，平時講得嘢多都會喉嚨痛，嚴重時更加要食類固醇控制病情。佢話今次喺本月初起發病，睇咗幾次醫生都未好番，醫生叫佢服用類固醇，希望可以令佢快啲好番。
佢仲話由於驚氣管容易受涼，平時出入都會避免吹風，如果預計當日將會長時期吹風，佢就會帶定條絲巾保護住條頸，費事氣管因過度受涼而引起支氣管發炎。佢又話雖然醫生勸佢講少啲嘢，但佢決定都係唔遵從醫生吩咐，因為佢每日都要講咁多嘢，叫佢完全唔講嘢係無可能喎！
