政壇：大輝買底褲送長毛入院
前日都講過，已經五十七歲嘅立法會議員「長毛」梁國雄因踢波勇戰受傷，導致左腳骨裂要留院六周治療。原來當日長毛受傷後，工業界林大輝第一時間護送長毛入院，仲做埋保母，幫佢買牙擦、牙膏不特止，連紙底褲都買埋，令長毛感受到建制派人情味嘅一面。
原來當日係大輝隊波同其他球隊打友誼賽，大輝親自邀請長毛助陣，所以長毛出事後，佢即刻護送長毛入院。雖然政見不同，但大輝呢個隊友都算唔話得，知道長毛要住院一段時間，於是即刻幫佢入貨買定各種生活用品，連紙底褲咁私密嘅嘢都幫長毛買，大輝真係夠晒體貼，大輝仲一估就估中長毛着大碼，唔知佢用乜嘢方法推測嘅呢？
究竟長毛點解受重傷？大輝事後分析話，除咗對手打茅波之外，另一主因當然係長毛「屎波」，唔能夠避開對手粗野攔截，所以佢勸長毛最好喺留院期間戒煙，如果身體狀態操fit啲，咁就冇咁易受傷喇。話時話，長毛經常去示威衝擊保安防線，身手冇乜理由咁渣o架？
